मंसिर २२, पोखरा । कन्या क्याम्पस पोखराको २९औं बार्षिकोत्सवको अवसरमा क्याम्पस परिसरमा वृक्षारोपण तथा कन्या जर्नल लोकार्पण गरिएको छ । क्याम्पस परिसरलाई स्वच्छ तथा हराभरा बनाउने उद्धेश्यले विरुवा रोपी बार्षिकोत्सव कार्यक्रमको उद्घाटन गरिएको थियो । त्यस्तै क्याम्पसमा आयोजित कार्यक्रममा कन्या क्याम्पस पोखरा अनुसन्धान व्यवस्थापन समितिले प्रकाशन गरेको कन्या जर्नल दोश्रो संस्करण लोकार्पण गरिएको छ । क्याम्पसमा प्राध्यापनरत प्राध्यापक तथा अन्य लेखकहरुको १० बिधामा अनुसन्धानमूलक लेखहरु समाबेश गरिएको जर्नल क्याम्पसका सञ्चालक समिति अध्यक्ष तथा कार्यक्रमका अध्यक्ष योगेन्द्र प्रधानले लोकार्पण गरेको थियो । उक्त जर्नलको लोकार्पण गर्नुहुदै प्रधानले क्याम्पसको अबको शिक्षा थप अनुसन्धानमूलक तथा व्यावहारिक शिक्षामा आधारित हुनेमा बिश्वस्त रहेको बताए । उक्त जर्नल प्रकाशनका लागि योगदान पुर्याउनुहुने सम्पादन संयोजक डा.नरहरी उपाध्याय गौतम, डा. भूमिराज बस्ताकोटी तथा सहप्राध्यापक दिपेन्द्र पराजुलीलाई हार्दिक धन्यवाद व्यक्त गरेका थिए ।
कन्या क्याम्पसको क्याम्पस प्रमुख सुरेस कुमार मानन्धरले क्याम्पसले शैक्षिक गुणस्तर सुनिश्चितता प्रमाणपत्र प्राप्त गर्न अन्तिम चरणमा पुगेको जानकारी गराउँदै क्याम्पसको शिक्षा अझ गुणस्तरीय बनाउने भनाई व्यक्त गरे । क्याम्पस सञ्चालक समितिको सदस्य शिवलाल मल्लले गुणस्तरमा बिश्वस्त रहने वातावरणको सिर्जना गराउने प्रतिवद्धता सहित नेपालको महिला शिक्षाको केन्द्र बनाउन पहल गर्ने बताए । क्याम्पस प्राध्यापक संघका उपसभापति तथा जर्नल सम्पादन समितिका सदस्य डा.भूमिराज बस्ताकोटीले क्याम्पसमा छोटो अवधिमा नै अनुसन्धानको कार्यमा धेरै फड्को मार्न सफल भएको जानकारी गराए । कन्या क्याम्पसका कर्मचारी निशा भण्डारीले बार्षिकोत्सवको अवसरमा शुभकामना व्यक्त गर्दै गुणस्तर सुनिश्चित क्याम्पस हुन लागेकोमा खुशी व्यक्त गरे । कन्या क्याम्पस छात्रा कल्याण समितिका संयोजक राममाया घलेले क्याम्पसमा शैक्षिक गुणस्तरमा धेरै सुधार भएको जानकारी गराए । क्याम्पसमा शुद्ध खानेपानीको व्यवस्था, लाइब्रेरीमा सुधार, इ लाइब्रेरीको व्यवस्था, कन्या आराम कक्ष, व्यवस्थित कम्प्यूटर ल्याव, परामर्श कक्ष, चमेना गृहमा सुधार, होस्टेलको व्यवस्था जस्ता सेवाहरुबाट क्याम्पसको गुणस्तर बृद्धि भएको बताए ।
उक्त कार्यक्रमलाई क्याम्पसका सहायक क्याम्पस प्रमुख चित्र बहादुर श्रेष्ठले सञ्चालन गरेका थिए । कार्यक्रममा छात्राहरु, कर्मचारी, प्राध्यापक, अभिभावक तथा सञ्चालक समितिको उपस्थिति रहेको थियो ।